THEATERGRUPPE BORSSUM

1948 gunnt los. De overal in Borssum bekannte Hinrich (Hinni) Bußmann quem up de Idee, in de Nahkriegstied de Minschen in Borssum mit Theaterspölen en bietje Plaiseer to brengen. Na fiefteihn Jahr (1963) overnamm "Schisko" (Anton) Janssen de Klottje un wur nee Spölbaas. Unner sien Föhrung truck de Klottje in de Aula van´t nee Osterbörgschaul. Mit nee Stücken quemen ok immer weer nee Spölers un Helpers dartau.

​

Dadör, dat uns Stücken bie de Taukiekers gaut anquämen, bin´t wi 1973 ok bi de AWO-Emden upfall´n. De daumalige Vörsitterin, Hertha Schierig, mok uns de Vörschlag eenmal för hör AWO-Lü to spölen. Se mende, dat dat Nee Theater neddegrat langen de. Uns wer dar toerst een Nümmer tau grot, un wi harrn al weike Knee, as wie dat erste  Mal up de grote Bühn´stunnen. De Freid, dor to spölen, hett bit vandag anhollen. Man unse Premiere hebben wie bit 1996 altied in Borssum hat.

Na een heel wunnerbaren un harmonischen Tied gav Anton Janssen ut Ollersgrünnen de Spölbaas 1982 in Wessel Rohlfs Hannen. Van 1987 of an het Horst Klamt de Spölbaas-Amt in sien Hannen hat. Hei föhrt in gaude Maneer de Arbeid van Vörgängers wieder. Unner sien Regie spölen wie neit blot dree Theaterstücken in´t Jahr, sünnern ok Sketche, Döntjes, up Festen, in Aulas, nett dor, wor man uns hebben will. In April 2008 hett Uta Höpfner de Wark van Horst Klamt overnomen. Siet de 18. April 2010 heet uns neej Spölbaas Tim Kruithoff. He word unnerstützt dör Maike Buß, Erika Brunken und Marion Krull.

​

An de 5. Mai 2017 wuur Tim Kruithoff to de Vorsitter van uns Gesamtverein wählt. He het uns Klottje in de verleden 7 Jahren na een Generationswessel nei ubbaut. Unner sien Regie hebben wi elke Jahr een Erstupföhrn un een Klassiker spöölt. Faken het Tim Kruithoff heel moderne Boulevardstücken sülmst na Oostfreesland un in Emder Platt overdragen - unvergeten is dat Stück "Rentners hebben noit Tied" dat in een Schrebertuun spöölt het un tau een van de meestbesöchste Stücken in de verleden 15 Jahr hörtes. He het sien gaude Wark in´t Juni 2017 in de Hannen van Manfred Rosenboom jun. overdragen. Manfred Rosenboom word unnerstützt van Erika Brunken, Kerstin van Hoorn und Marion Krull. Bi de Versammeln van de Theaterklottje an´t 19. April 2018 het Kerstin van Hoorn dat Spöölbaasamt van Manfred Rosenboom jun. overdragen kreegen. Lekkerste & Allerbest doormit.

Erika Brunken

Penningmester

Bernhard Brunken

Baas van de "Kulturabteilung"

Dietmar Groenhagen

Vorsitter van SV Blau-Weiß von 1920 Emden-Borssum e.V.